AP News: గూడ్స్‌పైకి ఎక్కి సెల్ఫీకి దుస్సాహసం..యువకుడికి తీవ్రగాయాలు

పిడుగురాళ్ల, న్యూస్‌టుడే: గూడ్సు రైలెక్కి సెల్ఫీ తీసుకునే మోజులో విద్యుత్తు తీగలు తగిలి ఓ యువకుడు తీవ్ర గాయాలపాలయ్యాడు. గుంటూరు జిల్లా పిడుగురాళ్లకు చెందిన కటకంశెట్టి సైదారావు కుమారుడు వీరబ్రహ్మం ఇంటర్‌ చదివి ఇంటి వద్దే ఉంటున్నాడు. బుధవారం సాయంత్రం రైల్వేస్టేషన్‌ పరిసరాల్లోకి బైక్‌పై వెళ్లాడు. నడికూడి నుంచి చెన్నై వెళ్లే గూడ్స్‌ రైలు ప్లాట్‌ఫాంపై ఆగి ఉండగా వీరబ్రహ్మం గార్డు ఉండే బోగీపైకి ఎక్కి సెల్ఫీ దిగేందుకు ప్రయత్నించాడు. కొద్ది ఎత్తులోనే ఉన్న విద్యుత్తు తీగలు తగిలి కిందపడిపోయాడు. ఒక్కసారిగా మంటలు చెలరేగడంతో గమనించిన సమీపంలోని గొర్రెల కాపరి వచ్చి మంటలార్పి దుస్తులు తొలగించాడు. రైల్వే పోలీసులు పట్టణంలోని ఓ ప్రైవేటు ఆసుపత్రికి తరలించారు. అతని పరిస్థితి విషమంగా ఉన్నట్లు తెలిసింది.