ములుగు జిల్లాలో రోడ్డు ప్రమాదం

కారు, ఆర్టీసీ బస్సు ఢీకొని నలుగురి దుర్మరణం

మృతుల్లో ముగ్గురు ఒకే కుటుంబానికి చెందినవారు

ములుగు, న్యూస్‌టుడే: ఉదయాన్నే ఆ రోడ్డు రక్తమోడింది. ఒకే కుటుంబంలోని ముగ్గురు సహా నాలుగు నిండు ప్రాణాలను బలిగొంది. ములుగు జిల్లాలో జరిగిన రోడ్డుప్రమాదంలో నలుగురు మృతిచెందగా ఒకరు ప్రాణాపాయస్థితిలో కొట్టుమిట్టాడుతున్నారు. ములుగు మండలం జాకారం పంచాయతీ శివారు గట్టమ్మ గుడి మూలమలుపు వద్ద 163 జాతీయ రహదారిపై శనివారం ఉదయం సుమారు 8.20 గంటల సమయంలో కారు, ఆర్టీసీ బస్సు ఢీకొని వాజేడు మండలం ధర్మారం గ్రామానికి చెందిన కమ్మంపాటి రమేష్‌ (49), ఆయన భార్య జ్యోతి (46), ఆయన సోదరుడు కమ్మంపాటి శ్రీనివాస్‌ (45), చంద్రుపట్ల గ్రామానికి చెందిన కారు డ్రైవర్‌ బుద్దె కల్యాణ్‌ (28) అక్కడికక్కడే మృతి చెందారు. శ్రీనివాస్‌ భార్య సుజాత (42) తీవ్ర గాయాలపాలయ్యారు. పోలీసుల కథనం ప్రకారం.. రమేష్‌ తన అన్న కుమారుడికి పెళ్లి సంబంధం చూసేందుకు ఉదయం కుటుంబసభ్యులతో కలిసి కారులో వాజేడు నుంచి బయలుదేరారు. గట్టమ్మ వద్దకు రాగానే మేడారం వెళ్తున్న హనుమకొండ డిపోనకు చెందిన ఆర్టీసీ బస్సు ఎదురుగా వచ్చి ఢీకొట్టింది. ఈ ప్రమాదంలో కారు నుజ్జునుజ్జయ్యింది. ఈ సమాచారం అందడంతో పోలీసులు అక్కడికి చేరుకుని కారులో ఇరుక్కుపోయిన మృతదేహాలను బయటికి తీయించారు. గాయపడిన సుజాతను వరంగల్‌ ఎంజీఎం ఆసుపత్రికి తరలించారు. ఈ ప్రమాదం కారణంగా సుమారు గంటసేపు వాహనాలు నిలిచిపోయాయి. పోలీసులు పొక్లెయిన్‌ సహాయంతో బస్సును, కారును పక్కకు తీయించి రాకపోకలను పునరుద్ధరించారు.