Crime News: దారుణం.. బతికున్న భార్యను పూడ్చిపెట్టిన భర్త

వేలూరు, న్యూస్‌టుడే: బతికున్న భార్యను పూడ్చిపెట్టాడో భర్త. ఈ దారుణ ఉదంతానికి సంబంధించి నిందితుడితోపాటు మరో ఇద్దరిని పోలీసులు అరెస్టు చేశారు. పోలీసుల కథనం ప్రకారం.. తమిళనాడు వేలూరు సమీపంలోని కాట్పాడి వడుకన్‌ తాంగల్‌కు చెందిన వినాయకం... ప్రైవేటు ఉద్యోగి. గుడియాత్తం నివాసి సుప్రజను (25) ప్రేమించి నాలుగేళ్ల కిందట పెళ్లాడాడు. దంపతులు కేవీ కుప్పం సమీపంలోని మడినాంపట్టులో నివాసముంటున్నారు. వారికి ఏడాదిన్నర పాప ఉంది. రెండు నెలల క్రితం సుప్రజ అనారోగ్యానికి గురైంది. అప్పుడు భార్యభర్తల మధ్య గొడవలు జరిగాయి. భార్యను వినాయకం తీవ్రంగా కొట్టడంతో ఆమె స్పృహ కోల్పోయింది. వినాయకం వెంటనే తన తమ్ముడు విజయ్‌, స్నేహితుడు శివకు ఫోన్‌ చేసి ఇంటికి పిలిచాడు. సుప్రజను అర్ధరాత్రి కవసంబట్టు చక్కెరతోపు అటవీ ప్రాంతానికి తీసుకెళ్లి సజీవంగా పాతిపెట్టారు. సుప్రజ కనిపించకపోవడంతో ఆమె కుటుంబ సభ్యులు కేవీ కుప్పం పోలీసులకు ఫిర్యాదు చేశారు. ఇన్‌స్పెక్టర్‌ సెంథిల్‌ కుమారి కేసు నమోదు చేశారు. నిందితులను మంగళవారం అరెస్టు చేసి దర్యాప్తు చేపట్టగా అసలు విషయం వెలుగు చూసింది. సుప్రజ మృతదేహాన్ని బయటకు తీయడానికి పోలీసులు చర్యలు చేపట్టారు.