సొరంగం పైకప్పు కూలి ట్రాక్టర్‌ డ్రైవరు మృతి

కందనూలు, న్యూస్‌టుడే: పాలమూరు-రంగారెడ్డి పనుల వద్ద సొరంగం పైకప్పు కూలి ఓ ట్రాక్టర్‌  డ్రైవరు మృతి చెందాడు. నాగర్‌కర్నూల్‌ జిల్లా కేంద్రం సమీపంలోని ఉయ్యాలవాడ వద్ద బుధవారం ఈ సంఘటన జరిగింది. ఎస్సై విజయ్‌కుమార్‌ తెలిపిన వివరాల ప్రకారం.. ఉయ్యాలవాడకు చెందిన శ్రీనివాస్‌రెడ్డి(38) ప్రాజెక్టు పనులు నిర్వహిస్తున్న కంపెనీలో ట్రాక్టర్‌ డ్రైవరుగా పనిచేస్తున్నారు. బుధవారం ఉదయం పనుల్లో భాగంగా శ్రీనివాస్‌రెడ్డి ట్రాక్టరును నడుపుకొంటూ నలుగురు కార్మికులతో కలిసి సొరంగంలోకి వెళ్లారు. మధ్యలో నీరు నిలవడంతో కార్మికులు పైపుల ద్వారా బయటికి పంపే ప్రయత్నం చేస్తుండగా పైకప్పు కూలింది. శ్రీనివాస్‌రెడ్డి తలపై రాళ్లు పడ్డాయి. తీవ్రగాయాలైన ఆయన్ను ఆసుపత్రికి తరలిస్తుండగా మధ్యలో మృతిచెందారు.