తెదేపా నేత అపహరణ

గంట తర్వాత తీవ్ర గాయాలతో ప్రత్యక్షం
కళ్లకు గంతలు కట్టి బండరాళ్లతో కొట్టారని బాధితుడి ఆవేదన

కల్లూరు, న్యూస్‌టుడే: చిత్తూరు జిల్లా సదుం మండలం బూరగమంద పంచాయతీ పచ్చార్లమాకులపల్లెకు చెందిన తెదేపా నేత ఎ.రాజారెడ్డిని శుక్రవారం సాయంత్రం గుర్తుతెలియని వ్యక్తులు అపహరించారు. కల్లూరు నుంచి పీలేరుకు వెళ్లే దారిలో పెట్రోలు బంకు సమీపంలోని టమాటా మండీ వద్ద రాజారెడ్డి ఉండగా గుర్తుతెలియని వ్యక్తులు బలవంతంగా కారులో ఎక్కించుకుని తీసుకెళ్లారు. గంట తర్వాత కల్లూరు నుంచి గంటావారిపల్లెకు వెళ్లే మార్గంలోని ఎలకమాను వద్ద తీవ్ర గాయాలతో రాజారెడ్డి పడి ఉన్నట్లు స్థానికుల ద్వారా సమాచారం అందడంతో హుటాహుటిన కల్లూరు ఎస్సై శ్రీనివాసులు సిబ్బందితో వెళ్లారు. అప్పటికే రాజారెడ్డి రెండు కాళ్లకు తీవ్ర గాయాలై పడి ఉండడాన్ని గమనించి 108 వాహనంలో పీలేరు ప్రభుత్వాస్పత్రికి తరలించారు. బాధితుడు రాజారెడ్డి మాట్లాడుతూ.. కల్లూరులో తనను గుర్తుతెలియని వ్యక్తులు కారులో తీసుకెళ్లారన్నారు. కళ్లకు గంతలు కట్టి గంటావారిపల్లె సమీపంలోని ఓ పొలంలోకి తీసుకెళ్లి బండరాళ్లతో రెండు కాళ్లపై కొట్టినట్లు చెప్పారు. పీలేరు ప్రభుత్వ ఆసుపత్రిలో పాకాల సీఐ ఆశీర్వాదం, కల్లూరు ఎస్సై శ్రీనివాసులు రాజారెడ్డిని విచారించారు. రాజారెడ్డిని పుంగనూరు తెదేపా నియోజకవర్గ ఇన్‌ఛార్జి చల్లా రామచంద్రారెడ్డి పరామర్శించారు.