Andhra News: ఇంటర్‌ విద్యార్థుల దాడిలో హోంగార్డు మృతి

నంద్యాల నేరవార్తలు, న్యూస్‌టుడే: మద్యం మత్తులో ఇంటర్మీడియట్‌ విద్యార్థులు, మరో యువకుడు దాడిచేయడంతో ఓ హోంగార్డు మృతి చెందిన సంఘటన నంద్యాల జిల్లా కేంద్రంలో చోటుచేసుకుంది. పోలీసులు తెలిపిన వివరాల మేరకు.. నంద్యాల జిల్లా శిరివెళ్ల మండలం గుండంపాడు గ్రామానికి చెందిన కుమ్మరి రాజశేఖర్‌ (44) నంద్యాల పట్టణంలోని రైల్వేస్టేషన్‌ సమీపంలో ఉన్న కేంద్ర గిడ్డంగుల సంస్థలో హోంగార్డుగా విధులు నిర్వహించేవారు. ఆదివారం అర్ధరాత్రి ముగ్గురు ఇంటర్‌ విద్యార్థులు, మరో యువకుడు మద్యం తాగేందుకు కార్యాలయ ఆవరణలోకి ప్రవేశించారు. మద్యం తాగి తిరిగి వెళుతున్న సమయంలో హోంగార్డు రాజశేఖర్‌ వారిని ఆపి లోపలికి ఎందుకొచ్చారని ప్రశ్నించారు. దీంతో వారు మమ్మల్నే అడుగుతావా అంటూ ఘర్షణకు దిగారు. మద్యం మత్తులో బలంగా తోసేయడంతో ఆయన తల గేటుకు తగిలి తీవ్ర గాయాలయ్యాయి. అపస్మారక స్థితిలో పడిఉన్న రాజశేఖర్‌ను తోటి హోంగార్డు రామసుబ్బయ్య స్థానిక ప్రభుత్వ ఆసుపత్రికి తరలించారు. అప్పటికే మృతి చెందినట్లు వైద్యులు నిర్ధారించారు. నిందితులను పోలీసులు అదుపులోకి తీసుకున్నట్లు సమాచారం.