యువకుణ్ని బలిగొన్న ఆన్‌లైన్‌ బెట్టింగ్‌

అశ్వారావుపేట గ్రామీణం, న్యూస్‌టుడే: ఆన్‌లైన్‌ బెట్టింగ్‌ యువకుడి ప్రాణాలను బలిగొంది. ఈ ఘటన భద్రాద్రి జిల్లాలో చోటుచేసుకుంది. స్థానికులు తెలిపిన వివరాలు.. అశ్వారావుపేట మండలం పేరాయిగూడేనికి చెందిన గంధం గులకరాజు చిట్టీ నగదు కట్టేందుకు తన పెద్ద కుమారుడు రాజేశ్‌(19) బ్యాంకు ఖాతాలో 4 రోజుల క్రితం రూ.15 వేలు వేశారు. కాగా యువకుడు ఆ నగదుతో ఆన్‌లైన్‌ గేమ్‌లో బెట్టింగ్‌ పెట్టి రూ.10 వేలు పోగొట్టుకున్నాడు. తండ్రి నగదు అడుగుతారని భయపడి శుక్రవారం రాత్రి పురుగు మందు తాగాడు.  కుటుంబీకులు బాధితుణ్ని సామాజిక ఆరోగ్య కేంద్రానికి తరలించారు. పరిస్థితి విషమంగా ఉండటంతో కొత్తగూడెం ఆసుపత్రికి తీసుకెళ్లగా అక్కడ చికిత్స పొందుతూ మృతి చెందాడు.