Andhra News: ల్యాప్‌టాప్‌ పేలుడు ఘటనలో గాయపడిన సాఫ్ట్‌వేర్‌ ఉద్యోగిని మృతి

బి.కోడూరు, న్యూస్‌టుడే: ల్యాప్‌టాప్‌ పేలి తీవ్రంగా గాయపడిన వైఎస్‌ఆర్‌ జిల్లా బి.కోడూరు మండలం మేకవారిపల్లె గ్రామానికి చెందిన సిద్దు సుమలత (22) శుక్రవారం తిరుపతిలో చికిత్స పొందుతూ మృతి చెందారు. మండల పరిషత్తు మాజీ ఉపాధ్యక్షుడు, తెదేపా నాయకుడు సిద్దు వెంకటసుబ్బారెడ్డి, లక్ష్మీనరసమ్మ దంపతుల రెండో కుమార్తె సుమలత బెంగళూరులోని ఒక సంస్థలో సాఫ్ట్‌వేర్‌ ఇంజినీర్‌గా పనిచేస్తున్నారు. ఈ నెల 18న తన ఇంటిలో మంచంపై కూర్చొని విధులు నిర్వహిస్తుండగా ఆమె ఛార్జింగ్‌ పెట్టిన ల్యాప్‌టాప్‌ ఒక్కసారిగా పేలింది. పరుపు, మంచానికి మంటలు అంటుకోవడంతో తీవ్రంగా గాయపడింది. కుటుంబసభ్యులు చికిత్స నిమిత్తం తిరుపతిలోని ఓ ప్రైవేటు ఆస్పత్రికి తరలించగా అక్కడ ఆమె చికిత్స పొందుతూ మృతి చెందారు. సుమలత ఉద్యోగంలో చేరి మూడునెలలే అయింది.