Telangana News: తలలో ఇనుప చువ్వతో 3 గంటలు నరకయాతన!

చికిత్స పొందుతూ నిర్మాణ కార్మికుడి మృతి
మోరీ పనులు చేస్తుండగా ప్రమాదం

హుజూరాబాద్‌ పట్టణం, న్యూస్‌టుడే : మోరీ నిర్మాణ పనుల్లో జారిపడిన నిర్మాణ కార్మికుడొకరు.. దవడ నుంచి తలపై వరకు ఇనుప చువ్వ చొచ్చుకుని.. మూడు గంటలపాటు నరకయాతన అనుభవించి..చివరకు చికిత్స పొందుతూ మృతి చెందాడు. స్థానికులు, పోలీసులు తెలిపిన వివరాల ప్రకారం.. కరీంనగర్‌ జిల్లా హుజూరాబాద్‌ లోని ఆర్టీసీడిపో క్రాసింగ్‌ వద్ద మోరీ నిర్మాణ పనులు నిర్వహిస్తున్నారు. వాటికి నీటితో క్యూరింగ్‌ చేసేందుకు వచ్చిన స్థానిక బుడిగజంగాల కాలనీకి చెందిన మౌటం రాజు(36) శుక్రవారం ప్రమాదవశాత్తు ఇనుప చువ్వలపై పడ్డాడు. దీంతో ఓ చువ్వ అతని దవడనుంచి తలపైకి దూసుకువచ్చింది. అతని కేకలు విన్న స్థానికులు 108 అంబులెన్సుకు సమాచారం అందించారు. అక్కడికి చేరుకున్న సిబ్బంది రాజు తలకు కింది భాగంలో చువ్వను కోసి తొలగించారు. ఉదయం 8.30గంటల సమయంలో పడిపోగా సుమారు గంటకు పైబడి చువ్వను పట్టుకుని రాజు ఉండిపోవడం చూపరులను కన్నీరు పెట్టించింది. 9.30గంటల ప్రాంతంలో స్థానిక ప్రభుత్వాసుపత్రికి తరలించారు. అక్కడ ప్రథమ చికిత్స అనంతరం మెరుగైన చికిత్స కోసం వరంగల్‌లోని ఎంజిఎం ఆసుపత్రికి 11.20గంటలకు తరలించారు. చికిత్స నిర్వహించి ఇనుప చువ్వను 11.35 గంటలకు తొలగించిన వెంటనే రాజు ప్రాణాలు విడిచినట్లు వైద్యులు నిర్ధారించారు.