తెదేపా కార్యాలయంలో బీభత్సం

మద్యం సీసాలు పగులగొట్టిన వైకాపా కార్యకర్తలు

బుచ్చెయ్యపేట, న్యూస్‌టుడే: అనకాపల్లి జిల్లా బుచ్చెయ్యపేట మండలం దిబ్బిడి గ్రామంలోని తెదేపా కార్యాలయంలో సోమవారం రాత్రి వైకాపా కార్యకర్తలు బీభత్సం సృష్టించారు. సర్పంచి పెదిరెడ్ల మాణిక్యం కుమారులు పవన్‌ కుమార్‌, చంద్రశేఖర్‌, కలిమి అనిల్‌ తదితరులు తాగిన మైకంలో తెదేపా కార్యాలయంలోకి వచ్చి ఖాళీ మద్యం సీసాలను పగులకొట్టి పారిపోయారని మాజీ ఎంపీటీసీ సభ్యుడు గొన్నాబత్తుల శ్రీనివాసరావు మంగళవారం పోలీసులకు ఫిర్యాదు చేశారు. ఈ మేరకు చోడవరం సీఐ సయ్యద్‌ ఇలియాస్‌ మహమ్మద్‌ దిబ్బిడి వచ్చి ఈ కార్యాలయాన్ని పరిశీలించారు. నిందితులపై కేసు నమోదు చేసినట్లు తెలిపారు. మాజీ ఎమ్మెల్యే కేఎస్‌ఎన్‌ఎస్‌ రాజు, నియోజకవర్గ తెదేపా ఇన్‌ఛార్జి బత్తుల తాతయ్య బాబు తదితరులు పార్టీ కార్యాలయాన్ని సందర్శించారు. అనంతరం స్టేషన్‌కు వెళ్లి పోలీసులతో మాట్లాడారు. మళ్లీ ఇలాంటివి పునరావృతం కాకుండా నిందితులపై వెంటనే చర్యలు తీసుకోవాలని డిమాండు చేశారు.