పరీక్ష రాస్తూనే కుప్పకూలి విద్యార్థి మృతి

పాతపట్నం, న్యూస్‌టుడే: శ్రీకాకుళం జిల్లా పాతపట్నంలో బుధవారం ఓ విద్యార్థి పరీక్ష రాస్తుండగానే కుప్పకూలి మృతి చెందాడు. సారవకోట మండలం దాసుపురం గ్రామానికి చెందిన బూరాడ కార్తీక్‌ (16) పాతపట్నం మహేంద్ర జూనియర్‌ కళాశాలలో ఎంపీసీ మొదటి సంవత్సరం చదువుతున్నాడు. స్థానిక బీసీ బాలుర వసతి గృహంలో ఉంటూ పరీక్షలకు హాజరవుతున్నాడు. బుధవారం ఉదయం తలనొప్పిగా ఉందని, వాంతులు చేసుకోవడంతో వసతిగృహ సంరక్షకుడు వైకుంఠరావు ఆసుపత్రిలో చూపించారు. కొద్దిసేపటికి తేరుకున్నాక ఉదయం 8.45 గంటలకు పరీక్ష కేంద్రానికి వెళ్లాడు. అక్కడ పరీక్ష రాస్తుండగానే 9.20 గంటలకు కుప్పకూలిపోయాడు. ఆసుపత్రికి తరలించగా అప్పటికే మృతి చెందినట్లు నిర్ధారించారు. నరాలు, మెదడుకు సంబంధించిన సమస్య వల్ల మృతి చెందినట్లు వైద్యులు భావిస్తున్నారు.