వడ్డీవ్యాపారి వేధింపులతో యువకుడి ఆత్మహత్య

మానకొండూర్‌, న్యూస్‌టుడే: వడ్డీ వ్యాపారి వేధింపుల కారణంగా ఓ యువకుడు ఆత్మహత్యకు పాల్పడ్డాడు. ఈ ఘటన కరీంనగర్‌ జిల్లా అన్నారంలో చోటుచేసుకుంది. పోలీసుల కథనం మేరకు.. మార్క ప్రశాంత్‌ గౌడ్‌(26)కు రామడుగు మండలం గుండి గ్రామానికి చెందిన అనన్యతో ఆర్నెల్ల కిందట వివాహం జరిగింది. ప్రస్తుతం ఆమె గర్భిణి. కరీంనగర్‌లోని ఓ ఫైనాన్స్‌ కంపెనీలో ప్రశాంత్‌ పనిచేస్తున్నాడు. అదే గ్రామానికి చెందిన ఓ వడ్డీ వ్యాపారి రామాంజనేయులు వద్ద కొంత అప్పు తీసుకున్నాడు. మొత్తం రూ.20 లక్షలైందని చెప్పగా అందులో కొంత చెల్లించాడు. మిగతాది ఇవ్వాలని వడ్డీ వ్యాపారి వేధిస్తున్నాడు. దీంతో గురువారం రాత్రి ప్రశాంత్‌ పురుగుల మందు తాగారు. చికిత్స నిమిత్తం కరీంనగర్‌లోని ఓ ప్రైవేట్‌ ఆసుపత్రికి తరలించగా శుక్రవారం మరణించారు. మృతుని వద్ద నాన్న, అమ్మ, సోదరుని పేరిట రాసిన ఓ లేఖ లభించింది. వివాహం చేసుకొని అనన్యకు అన్యాయం చేశానని, సారీ అనన్య అంటూ లేఖలో ఉంది. కాగా జమ్మికుంట-మానకొండూర్‌ రహదారిపై బాధిత కుటుంబీకులు, బంధువులు, గ్రామస్థులు ధర్నా చేపట్టారు. బాధితులకు న్యాయం చేస్తానని సీఐ క్రిష్ణారెడ్డి హామీ ఇవ్వడంతో రాస్తారోకోను విరమించారు.