తండ్రి దశదిన కర్మకు డబ్బులు లేవని తనయుడి ఆత్మహత్య

శామీర్‌పేట, న్యూస్‌టుడే: తండ్రి దశదినకర్మ నిర్వహణకు డబ్బులు లేవనే మనస్తాపంతో కుమారుడు ఆత్మహత్య చేసుకున్న విషాద ఘటన మేడ్చల్‌-మల్కాజిగిరి జిల్లా మూడుచింతలపల్లి మండలంలో శనివారం చోటుచేసుకుంది. అద్రాస్‌పల్లికి చెందిన గ్యార నర్సింహ(32) లారీ డ్రైవర్‌గా పనిచేసేవారు. ఆయన పని చేసే లారీకి ఇసుక గిరాకీ సక్రమంగా దొరకడం లేదు.  ఈ నెల 21న నర్సింహ తండ్రి యాదగిరి అనారోగ్యంతో మృతి చెందారు. తండ్రి దశదిన కర్మకు డబ్బులు చేతికందలేదు. మనస్తాపానికి గురై ఇంట్లో ఫ్యాన్‌కు ఉరివేసుకొని బలవన్మరణానికి పాల్పడ్డారు. 10 రోజుల వ్యవధిలోనే తండ్రి, కుమారుడు మృతి చెందడంతో కుటుంబంలో విషాద ఛాయలు నెలకొన్నాయి.