Andhra News: పెళ్లయిన మూడు రోజులకే... ప్రేమికుడితో వెళ్లిపోయిన వివాహిత!

మంత్రాలయం, న్యూస్‌టుడే: పెళ్లయిన మూడు రోజులకే ప్రేమించిన వ్యక్తితో వివాహిత వెళ్లిపోవడం వివాదానికి దారితీసింది. ఆగ్రహించిన కుటుంబీకులు యువతి ప్రేమికుడి ఇంటికి నిప్పుపెట్టారు. ఆ సమయంలో ఇంట్లో ఎవరూ లేకపోవడంతో పెద్ద ప్రమాదం తప్పింది. కర్నూలు జిల్లా మంత్రాలయం మండలం మాధవరంలో ఈ ఘటన ఆదివారం చోటుచేసుకుంది.

మాధవరం గ్రామానికి యువతితో ఈ నెల 9న సమీపంలోని ఓ గ్రామానికి చెందిన యువకుడికి ఇచ్చి పెళ్లి చేశారు. అయితే అంతకుముందే ఆమె మాధవరానికి చెందిన శివాజీని ప్రేమించింది. పెళ్లయిన మూడో రోజున శివాజీ... ఆమెను తీసుకుని వెళ్లిపోయాడు. ఇది తెలుసుకున్న వధూవరుల బంధువులు ఆదివారం రాత్రి శివాజీ ఇంటికి నిప్పుపెట్టారు. అందులో దుస్తులు, బియ్యం కాలిపోయాయి. ఎస్‌ఐ రాజకుళ్లాయప్ప సిబ్బందితో వెళ్లి చుట్టుపక్కల వారితో కలిపి మంటలు ఆర్పేశారు. ఆ సమయానికి శివాజీ కుటుంబసభ్యులు ఎవరూ ఇంట్లో లేకపోవడంతో పెద్ద ప్రమాదమే తప్పింది. బాధితుల ఫిర్యాదుతో కేసు నమోదు చేసినట్లు ఎస్‌ఐ తెలిపారు.