పొక్లెయిన్‌కు మావోయిస్టుల నిప్పు

మరోటి అపహరణ

చర్ల, న్యూస్‌టుడే: భద్రాద్రి కొత్తగూడెం జిల్లా చర్ల మండలం గోరుకొండ అటవీ ప్రాంతంలో ఓ పొక్లెయిన్‌ను మావోయిస్టు మిలీషియా సభ్యులు తగులబెట్టారు. మరో పొక్లెయిన్‌ను అపహరించుకుపోయారు. ఈ ఘటన ఆలస్యంగా వెలుగులోకి వచ్చింది. గోరుకొండ అటవీ ప్రాంతంలో గతకొన్ని రోజులుగా కంపా నిధులతో అభివృద్ధి పనులు జరుగుతున్నాయి. ఆదివారం ఆ ప్రాంతానికి చేరుకున్న మావోయిస్టు మిలీషియా సభ్యులు పనులకు వినియోగిస్తున్న పొక్లెయిన్‌కు నిప్పంటించడంతో కొంతమేరకు కాలిపోయింది. మరో పొక్లెయిన్‌ను, ద్విచక్ర వాహనాన్ని, ఆ ప్రాంతంలో భోజనం చేస్తున్న కొందరు యువకుల సెల్‌ఫోన్లను కూడా తమ వెంట తీసుకెళ్లారు. స్థానిక సీఐ అశోక్‌, అటవీ క్షేత్రాధికారి ఉపేందర్‌ సంఘటన ప్రాంతాన్ని పరిశీలించారు. ఛత్తీస్‌గఢ్‌ మావోయిస్టు మిలీషియా బృందం ఈ ఘటనకు పాల్పడ్డట్టు తెలుస్తోంది.

‘అగ్నిపథ్‌తో యువతను మోసగిస్తున్న కేంద్రం’

దేశంలో ఉద్యోగ ఖాళీలను భర్తీ చేయకుండా కేంద్ర ప్రభుత్వం అగ్నిపథ్‌ పథకం పేరుతో యువతరాన్ని మోసగిస్తోందని మావోయిస్టు పార్టీ తెలంగాణ రాష్ట్ర అధికార ప్రతినిధి జగన్‌ సోమవారం ఓ లేఖలో విమర్శించారు. సికింద్రాబాద్‌ రైల్వే స్టేషన్‌లో నిరుద్యోగ యువతపై జరిగిన కాల్పుల ఘటనను ప్రతి ఒక్కరూ ఖండించాలని ఆయన పిలుపునిచ్చారు. కేంద్రం ఈ పథకాన్ని రద్దుచేయాలని డిమాండ్‌ చేశారు. పోలీసు కాల్పుల్లో మరణించిన రాకేష్‌ కుటుంబానికి కేంద్రం రూ.2 కోట్లు, గాయపడిన వారికి రూ.కోటి పరిహారం చెల్లించాలని కోరారు.