జగిత్యాలలో న్యాయవాదిపై దాడి

జగిత్యాల, న్యూస్‌టుడే: జగిత్యాల జిల్లా కేంద్రంలో గురువారం ఓ న్యాయవాదిపై దాడి జరిగింది. పోలీసులు తెలిపిన వివరాల ప్రకారం.. జగిత్యాలకు చెందిన ముస్కె లక్ష్మణ్‌ అనే వ్యక్తి ఇదే పట్టణంలోని మార్కండేయనగర్‌లో నివాసముంటున్న న్యాయవాది ఎం.డి.సలీంకు ఓ కేసుకు సంబంధించిన పత్రాలు ఇచ్చాడు. గురువారం ఉదయం తన కుమారుడు శ్యాంతో కలిసి సలీం ఇంటికి వెళ్లిన లక్ష్మణ్‌ ఆ పత్రాలు ఇవ్వాలంటూ వాదనకు దిగాడు. న్యాయవాది వాటిని వెతుకుతుండగా లక్ష్మణ్‌ ఇటుకతో తలపై కొట్టాడు. కిటికి అద్దాలు ధ్వంసం చేసి వాటితో సలీంను పొడిచాడు. దీంతో రక్తగాయమైంది. న్యాయవాది భార్య అయేషా కేకలు వేయడంతో చుట్టుపక్కల వారు రాగా.. అంతలోనే దాడికి పాల్పడ్డ లక్ష్మణ్‌, అతని కుమారుడు శ్యాం పారిపోయారు. ఈ ఘటనపై పట్టణ పోలీసులు కేసు నమోదు చేశారు. న్యాయవాదిని చికిత్స కోసం జిల్లా కేంద్ర ఆసుపత్రికి పంపించారు. దాడి ఘటనను నిరసిస్తూ న్యాయవాదులు జిల్లావ్యాప్తంగా విధులు బహిష్కరించి నిందితులను కఠినంగా శిక్షించాలని డిమాండ్‌ చేశారు. నిందితులకు న్యాయవాదులెవరూ బెయిల్‌ పిటిషన్‌ వేయొద్దని నిర్ణయించినట్లు బార్‌ అసోసియేషన్‌ అధ్యక్షుడు ముద్దం ప్రభాకర్‌ తెలిపారు.