పిడుగుపాటుకు రైతు మృతి

పెంచికల్‌పేట్, న్యూస్‌టుడే: కుమురం భీం ఆసిఫాబాద్‌ జిల్లా పెంచికల్‌పేట్ మండలం అగర్‌గూడ గ్రామానికి చెందిన పాలె బ్రహ్మయ్య(46) అనే రైతు పిడుగు పడి మృతి చెందారు. గ్రామస్థులు తెలిపిన వివరాల ప్రకారం.. బ్రహ్మయ్య గురువారం ఉదయం వ్యవసాయ పనులకోసం తన చేనులోకి వెళ్లారు. మధ్యాహ్నం ఒక్కసారిగా ఉరుములు, మెరుపులు రావడంతో సమీపంలోని చెట్టు కిందికి చేరారు. కొంతసేపటికి పిడుగుపడటంతో అక్కడికక్కడే మరణించారు. బ్రహ్మయ్యకు భార్య మమత, ఇద్దరు కుమార్తెలు ఉన్నారు. ఇటీవలే పెద్ద కుమార్తె వివాహం చేశారు. భార్య ఫిర్యాదు మేరకు కేసు నమోదు చేసినట్లు ఎస్సై రామన్‌కుమార్‌ తెలిపారు.