రైతును బలిగొన్న విద్యుత్తు తీగ

మాగనూరు, న్యూస్‌టుడే : నారాయణపేట జిల్లాలో తెగిన విద్యుత్తు తీగ ఓ రైతును బలిగొంది. గ్రామస్థులు, కుటుంబ సభ్యులు తెలిపిన వివరాల ప్రకారం.. మాగనూరు మండలం ఓబుళాపూర్‌ గ్రామానికి చెందిన రైతు ఎలిమెని కిష్టప్ప (44) శుక్రవారం ఉదయం పొలానికి బయలుదేరారు. పొలం గట్టుపై నడుచుకుంటూ వెళుతుండగా.. పక్కనే ఉన్న విద్యుత్తు ట్రాన్స్‌ఫార్మర్‌కు 11 కేవీ లైన్‌ను అనుసంధానం చేసే రాడ్‌ తగిలి విద్యుదాఘాతానికి గురయ్యారు. సమీప పొలాల రైతులు గుర్తించి వెంటనే మక్తల్‌ ప్రభుత్వ ఆసుపత్రికి తరలించగా కిష్టప్ప  మృతి చెందినట్లు వైద్యులు నిర్ధారించారు.