న్యాయమూర్తులనూ వదలని సైబర్‌ నేరగాళ్లు

సీఐడీకి ఫిర్యాదు చేసిన రిజిస్ట్రార్‌ జనరల్‌

ఈనాడు, అమరావతి: న్యాయమూర్తులు, న్యాయవ్యవస్థకు చెందిన ప్రముఖుల ఫోటోలను వాట్సప్‌ డీపీలుగా పెట్టుకొని ఆర్థిక అక్రమాలకు పాల్పడుతున్న సైబర్‌ నేరగాళ్లపై హైకోర్టు రిజిస్ట్రార్‌ జనరల్‌.. సీఐడీకి ఫిర్యాదు చేశారు. ఇలాంటివారి విషయంలో అప్రమత్తంగా ఉండాలని సిబ్బందిని హైకోర్టు కోరింది. ఆర్థిక సాయం కోసం సైబర్‌ నేరగాళ్లు పంపే సందేశాలను విస్మరించాలంది. ఈ మేరకు రిజిస్ట్రార్‌ జనరల్‌ ఏవీ రవీంద్రబాబు సర్క్యులర్‌ జారీచేశారు. న్యాయమూర్తులు, న్యాయ ప్రముఖుల వాట్సప్‌ డీపీలుగా పెట్టుకున్న నేరగాళ్లు.. విశ్రాంత న్యాయమూర్తులు, న్యాయాధికారులు, న్యాయ సిబ్బందిని ఆర్థిక సాయం అడుగుతూ మోసగించేందుకు యత్నించారు. ఇలాంటి ఘటనలు కొన్ని హైకోర్టు జడ్జీల దృష్టికి వచ్చాయి. దీంతో రిజిస్ట్రార్‌ జనరల్‌ సీఐడీకి ఫిర్యాదు చేశారు.