చెరువు నీటిలో భూమి మునుగుతోందని..

దివ్యాంగ రైతు ఆత్మహత్య

నాగర్‌కర్నూల్‌, న్యూస్‌టుడే: చెరువు పరిధిలో ఉన్న భూమి నీట మునుగుతోందన్న మనస్తాపంతో దివ్యాంగుడైన ఓ రైతు ఆత్మహత్య చేసుకున్నాడు. ఈ ఘటన నాగర్‌కర్నూల్‌ జిల్లాలో చోటుచేసుకుంది. ఎస్సై విజయ్‌కుమార్‌ తెలిపిన వివరాల ప్రకారం.. నాగర్‌కర్నూల్‌ పురపాలక సంఘం పరిధిలోని ఉయ్యాలవాడకు చెందిన ఆదిరాల కాశన్న(65)కు గ్రామ శివారులోని కేసరి సముద్రం చెరువు సమీపంలో రెండెకరాల భూమి ఉంది. ఆ భూమిలోనే పంటలు సాగుచేస్తూ కుటుంబాన్ని పోషిస్తున్నారు. ఈ క్రమంలో అధికారులు గత మూడేళ్లుగా కేఎల్‌ఐ ఎత్తిపోతల ద్వారా చెరువును నింపుతున్నారు. ఆ భూమి మొత్తం నీటిలో మునుగుతుండటంతో పంటలను సాగు చేయలేకపోతున్నారు. దివ్యాంగుడైన కారణంగా ఇతర పనులనూ చేసుకోలేకపోతున్నారు. నీటిలో మునుగుతున్న వ్యవసాయ భూమికి పరిహారం ఇప్పించాలని, లేనిపక్షంలో జీవనోపాధి కల్పించి న్యాయం చేయాలంటూ గత కొన్నాళ్లుగా అధికారులు, ప్రజాప్రతినిధులను వేడుకుంటున్నారు. ఫలితం లేకపోవడంతో గురువారం రాత్రి చెరువు పక్కనే ఉన్న రేకుల గదిలో ఉరేసుకున్నారు. శుక్రవారం ఉదయం కుటుంబసభ్యులు గమనించారు.