ఇద్దరు ఐటీ విభాగం ఉద్యోగుల అరెస్టు

ఈనాడు, హైదరాబాద్‌: అధికారిక పని కోసం లంచం డిమాండు చేసిన ఇద్దరు ఆదాయపన్నుశాఖ(ఐటీ) ఉద్యోగుల(సీనియర్‌ టాక్స్‌ అసిస్టెంట్లు)ను సీబీఐ అధికారులు పట్టుకున్నారు. టీడీఎస్‌ ధ్రువపత్రం జారీ చేసేందుకు ఐటీ శాఖ హైదరాబాద్‌ కార్యాలయంలో పనిచేస్తున్న వికాస్‌కుమార్‌, విశాఖపట్నంలో పనిచేస్తున్న ఎం.రవికుమార్‌లు ఓ వ్యక్తి నుంచి రూ.లక్ష లంచం డిమాండు చేశారు.  రెండు రాష్ట్రాల్లోనూ వ్యాపారం నిర్వహిస్తున్న సదరు బాధితుడి నుంచి రూ.60 వేలు తీసుకునేందుకు వారు ఒప్పుకున్నారు. ఈ మేరకు శుక్రవారం సాయంత్రం వికాస్‌కుమార్‌ తన ఇంట్లో రూ.40వేలు తీసుకుంటుండగా సీబీఐ అధికారులకు రెడ్‌హ్యాండెడ్‌గా దొరికిపోయాడు. తన వాటాగా వచ్చే మిగతా రూ.20వేలను రవికుమార్‌ ఆన్‌లైన్‌ ద్వారా బదిలీ చేయించుకున్నాడు. దీంతో ఆయన్ను విశాఖపట్నంలో అరెస్టు చేశారు. వారిద్దరిని సీబీఐ అధికారులు స్థానిక న్యాయస్థానాల్లో హాజరుపరిచి అనంతరం జైళ్లకు తరలించారు.