16 ఫిన్‌టెక్‌ కంపెనీలకు ‘వజీర్‌ఎక్స్‌’ సహకారం

చైనా రుణయాప్‌ సంస్థల క్రిప్టో లావాదేవీల్లో ఈ కంపెనీలే కీలకం

ఈడీ దర్యాప్తులో వెల్లడి

బ్యాంకు ఖాతాల్లోని రూ.64.67 కోట్ల స్తంభన

ఈనాడు, హైదరాబాద్‌: చైనా రుణయాప్‌ సంస్థల సొమ్మును క్రిప్టో కరెన్సీల్లోకి మార్చి హవాలా మార్గంలో విదేశాలకు తరలించడంలో ముంబయి జాన్మై ల్యాబ్స్‌ అధీనంలోని వజీర్‌ఎక్స్‌ ఎక్ఛేంజ్‌ కీలకంగా వ్యవహరించినట్లు డైరెక్టరేట్‌ ఆఫ్‌ ఎన్‌ఫోర్స్‌మెంట్‌(ఈడీ) దర్యాప్తులో వెల్లడైంది. రుణయాప్‌ సంస్థల లావాదేవీలకు వెన్నుదన్నుగా నిలిచిన 16 అనుమానిత ఫిన్‌టెక్‌ కంపెనీల లావాదేవీలకూ ఈ ఎక్ఛేంజ్‌ సహకారం అందించినట్లు గుర్తించింది. హైదరాబాద్‌లోని ఎక్ఛేంజ్‌ డైరెక్టర్‌ సమీర్‌మాత్రే కార్యాలయం, ఇళ్లలో బుధ, గురువారాల్లో సోదాలు నిర్వహించి పలు కీలక ఆధారాల్ని సేకరించింది. ఎక్ఛేంజ్‌లోని సమాచారం అంతా మాత్రే కనుసన్నల్లోనే ఉన్నట్లు గుర్తించింది. ఆ సంస్థకు చెందిన బ్యాంకు ఖాతాల్లోని రూ.64.67 కోట్లను స్తంభింపజేసింది.
స్వల్ప వ్యవధి రుణాలకు భారీ వడ్డీ విధించడంతోపాటు చెల్లింపుల కోసం రుణగ్రస్థులపై తీవ్ర వేధింపులకు పాల్పడి పలువురి మరణాలకు కారణమైన చైనా రుణయాప్‌ సంస్థల సొమ్మును అక్రమంగా దేశం దాటించడంలో వజీర్‌ఎక్స్‌ ఎక్ఛేంజ్‌ సహకారం ఉందని ముందునుంచీ ఈడీ అనుమానిస్తోంది. ఇందులో భాగంగా అనుమానిత క్రిప్టో లావాదేవీల వివరాలు తెలపాలని పలుమార్లు అడిగింది. ఎక్ఛేంజ్‌ నిర్వాహకులు స్పందించకపోవడంతో తమ అనుమానం నిజమేనని ధ్రువీకరించుకుంది. కేమన్‌ ఐలాండ్‌ దీవుల్లోని క్రౌడ్‌ఫైర్‌ బైనాన్స్‌, సింగపూర్‌లోని జెట్టయ్‌ పీటీఈ లిమిటెడ్‌ సంస్థలతో జాన్మై ల్యాబ్స్‌ వెబ్‌ ఒప్పందం కుదుర్చుకున్నట్టు దర్యాప్తులో తేల్చింది. తమ ఎక్ఛేంజ్‌ క్రిప్టో-క్రిప్టో, రూపాయి-క్రిప్టో లావాదేవీల్లో క్రౌడ్‌ఫైర్‌ బైనాన్స్‌తో ఒప్పందంలో ఉందని తొలుత చెప్పిన వజీర్‌ఎక్స్‌ ఎండీ నిశ్చల్‌శెట్టి..తర్వాత మాట మార్చి కేవలం రూపాయి-కిప్ట్రో లావాదేవీలు మాత్రమే చేస్తున్నామని చెప్పడాన్ని ఈడీ తప్పుపడుతోంది. మరోవైపు లోన్‌ యాప్‌లకు సంబంధించి కేవైసీ నిబంధనలను ఎక్ఛేంజ్‌ నిర్వాహకులు అనుసరించలేదని, లావాదేవీల వివరాలను బ్లాక్‌ చెయిన్‌ టెక్నాలజీల్లో నిక్షిప్తం చేయకుండా మనీలాండరింగ్‌ నిరోధక చట్టం నిబంధనల్ని ఉల్లంఘించారని నిర్ధారణకు వచ్చి దాడులను విస్తృతం చేసింది.