పల్లెవనం కోసం భూమి చదును.. రైతు ఆత్మహత్యాయత్నం

కౌడిపల్లి, న్యూస్‌టుడే: తాను సాగు చేసుకుంటున్న పొలంలో (అటవీ భూమి) పల్లె వనం ఏర్పాటుకు అధికారులు చదును చేయడంపై కలత చెందిన ఓ రైతు ఆత్మహత్యాయత్నం చేశారు. మెదక్‌ జిల్లా కౌడిపల్లి మండలం దేవులపల్లిలో ఆదివారం ఈ ఘటన జరిగింది.   శ్రీశైలం అనే రైతు దేవులపల్లిలో వ్యవసాయం చేసుకుంటున్నారు. దానికి పక్కనే ఉన్న రెండెకరాల అటవీశాఖ భూమిని కాస్తు చేస్తూ పంటలు పండిస్తున్నారు. అందులో ఎకరం భూమిలో రూ.50 వేలు వెచ్చించి ఇటీవల మిరప మొక్కలు నాటారు. 5 నెలల కిందట ఆ భూమితో పాటు పక్కనే ఉన్న అయిదెకరాలను బృహత్‌ పల్లె ప్రకృతివనం ఏర్పాటుకు కేటాయించారు. ఈ క్రమంలో మిరప పంటను శనివారం జేసీబీతో అధికారులు తొలగిస్తుండగా రైతు అడ్డుకున్నారు. ఈ విషయమై అటవీశాఖ డిప్యూటీ రేంజ్‌ అధికారిణి కౌడిపల్లి పోలీస్‌ స్టేషన్‌లో ఫిర్యాదు చేశారు. దీంతో మనోవేదనకు గురైన శ్రీశైలం ఆదివారం ఉదయం పొలం వద్దకు వెళ్లి తన సమస్యను వీడియో తీసి గ్రామ వాట్సప్‌ గ్రూప్‌లో పోస్టు చేశారు. ఆ తర్వాత గడ్డి మందు తాగారు. సమీప రైతులు, కుటుంబ సభ్యులు ఆయనను మెదక్‌ ప్రభుత్వాసుపత్రికి తరలించగా.. వైద్యులు చికిత్స అందిస్తున్నారు.