ప్రేమికులనే ప్రచారంతో ఆత్మహత్యాయత్నం

చికిత్స పొందుతూ యువకుడి మృతి

కోలుకుంటున్న బాలిక

నిజామాబాద్‌ నేరవార్తలు, న్యూస్‌టుడే: అన్నాచెల్లెలుగా ఉంటున్న తమపై.. ప్రేమికులనే ముద్ర వేశారనే మనస్తాపంతో ఇద్దరు ఆత్మహత్యాయత్నానికి పాల్పడిన ఘటన నిజామాబాద్‌లో జరిగింది. మూడో ఠాణా ఎస్సై భాస్కరాచారి వివరాల ప్రకారం.. నందిపేట్‌కు చెందిన యువకుడు(22) నిజామాబాద్‌లో ల్యాబ్‌ టెక్నీషియన్‌గా పనిచేస్తున్నాడు. అదే మండలంలోని ఓ గ్రామానికి చెందిన బాలిక(17) నిజామాబాద్‌లో పాలిటెక్నిక్‌ రెండో సంవత్సరం చదువుతోంది. వీరిద్దరికి పరిచయం ఏర్పడింది. తామిద్దరం అన్నాచెల్లెలుగా ఉంటుంటే అందరూ ప్రేమికులుగా ప్రచారం చేశారని లేఖ రాసి.. ఈనెల 8న రాత్రి 8 గంటలకు జిల్లా కేంద్రంలోని గిరిరాజ్‌ డిగ్రీ కళాశాల సమీపానికి చేరుకొన్నారు. గడ్డి మందు తాగి ఆత్మహత్యాయత్నానికి పాల్పడ్డారు. అటుగా వెళ్తున్న స్థానికులు గుర్తించి ఆసుపత్రికి తరలించారు. అనంతరం కుటుంబ సభ్యులకు సమాచారం ఇచ్చారు. చికిత్స పొందుతూ యువకుడు బుధవారం ఉదయం మృతి చెందాడు. బాలిక ఆసుపత్రిలో కోలుకుంటోంది. మూడో ఠాణా పోలీసులు కేసు నమోదు చేసుకొని దర్యాప్తు చేస్తున్నారు.