Karimnagar: జెండావందనం రోజున దారుణం.. రోడ్డుపైకి ఈడ్చుకెళ్లి భార్య గొంతు కోసిన భర్త

చిగురుమామిడి; న్యూస్‌టుడే: జాతీయ జెండా సాక్షిగా భార్యను భర్త దారుణంగా హత్య చేసిన దారుణ సంఘటన కరీంనగర్‌ జిల్లా కేశవపట్నంలో చోటుచేసుకుంది. పోలీసుల కథనం ప్రకారం.. చిగురుమామిడి మండలం ఇందుర్తికి చెందిన కనకం ప్రవీణ్‌, కేశవపట్నం మండల కేంద్రానికి చెందిన శిరీష(30) 11 ఏళ్ల కిందట ప్రేమించి పెళ్లి చేసుకున్నారు. వీరికి 9, 8 ఏళ్ల వయసున్న ఇద్దరు పిల్లలున్నారు.

శిరీష నాలుగేళ్లుగా అంగన్‌వాడీ ఆయాగా పనిచేస్తున్నారు. భార్యాభర్తల మధ్య కుటుంబ కలహాలు జరుగుతున్నాయి. శిరీష కేశవపట్నంలోనే ఉంటున్నారు. విడాకుల కోసం భర్తకు నోటీసులు పంపించారు. సోమవారం అంగన్‌వాడీ కేంద్రం వద్ద జాతీయ జెండా ఆవిష్కరణలో ఆమె పాల్గొన్నారు. చిన్నారులకు మిఠాయిలు పంపిణీ చేసేందుకు సిద్ధమవుతున్న సమయంలో అక్కడికి వచ్చిన ప్రవీణ్‌ ఆమెను రోడ్డుపైకి ఈడ్చుకెళ్లాడు. జనం చూస్తుండగానే కత్తితో గొంతు కోయడంతో ఆమె సంఘటన స్థలంలోనే తుదిశ్వాస విడిచింది. కుమార్‌ అనే యువకుడు అడ్డుకోబోగా.. కత్తితో పొడవడంతో చిన్నగాయమైంది. నిందితుడు పరారీలో ఉన్నాడు.