హత్యాచార నిందితుడిని చంపిన స్థానికులు

ఉత్తర లఖింపుర్‌: ఓ హత్యాచారం కేసులో కోర్టుకు తీసుకువచ్చిన నిందితుడు.. పోలీసుల కళ్లగప్పి తప్పించుకోగా స్థానికులు కొట్టి చంపారు. ఈ ఘటన అస్సాంలోని ఉత్తర లఖింపుర్‌లో గురువారం చోటుచేసుకుంది. గెర్జాయ్‌ బారువా(45)ను హత్యాచారం కేసులో విచారణ నిమిత్తం మంగళవారం ఢక్వాఖానా జుడిషియల్‌ మేజిస్ట్రేట్‌ కోర్టుకు తీసుకురాగా, మరుగుదొడ్డికి వెళ్లి అక్కడినుంచి పారిపోయాడు. కిలాకిలి గ్రామ సమీపంలో ఓ ప్రవాహం వద్ద గెర్జాయ్‌ దాక్కుని ఉండగా గ్రామస్థులు  అతణ్ని పట్టుకుని పోలీసులకు సమాచారమిచ్చారు.  పోలీసులకు అక్కడకు వచ్చేలోపు వారు గెర్జాయ్‌పై దాడికి పాల్పడ్డారు. తీవ్రగాయాలపాలైన అతడిని పోలీసులు ఆసుపత్రికి తరలించగా, అప్పటికే ప్రాణాలు కోల్పోయినట్లు వైద్యులు తెలిపారు.