ఎన్‌ఐఏ చేతికి పీఎఫ్‌ఐ కేసు!

ఇందూరు సిటీ, న్యూస్‌టుడే: దేశంలో మతపరమైన దాడులకు కుట్ర కేసులో కీలక అడుగు పడింది. ఈ కేసు వివరాలు, ఆధారాలు తమకు అందజేయాలని ఎన్‌ఐఏ అధికారులు రాష్ట్ర పోలీసులకు ఇటీవల లేఖ రాశారు. త్వరలోనే ఓ బృందం నిజామాబాద్‌ జిల్లాకు వచ్చి విచారణ జరిపే అవకాశాలున్నాయి. పీఎఫ్‌ఐ ఆధ్వర్యంలో.. కరాటే శిక్షణ ముసుగులో దేశంలో మతపరమైన దాడులకు కుట్రపన్నిన ఉదంతం వెలుగుచూసింది. దాడులు ఎలా చేయాలనే అంశంపై ఆటోనగర్‌ పరిధిలోని ఓ ఇంట్లో యువతకు శిక్షణ ఇచ్చినట్లు పోలీసులు గుర్తించారు. జులై 4న కేసు నమోదు చేసి, మొదట శిక్షకుడు ఖాదర్‌ను అరెస్టు చేశారు. తర్వాత మరో ముగ్గురిని అదుపులోకి తీసుకొన్నారు. మరో 24 మంది నిందితులు పరారీలో ఉన్నారు.