దస్తగిరి దంపతులను విచారించిన సీబీఐ

ఈనాడు డిజిటల్‌-కడప, న్యూస్‌టుడే-పులివెందుల: మాజీమంత్రి వివేకానందరెడ్డి హత్యకేసులో అప్రూవర్‌గా మారిన డ్రైవర్‌ దస్తగిరి, ఆయన భార్యను సీబీఐ గురువారం పులివెందులలో విచారించింది. గత ఆరు నెలలుగా పులివెందుల వైకాపా నాయకుల నుంచి ఎదురైన ఇబ్బందులు, బెదిరింపులను సీబీఐ దృష్టికి దస్తగిరి తీసుకెళ్లినట్లు తెలిసింది. భార్యాభర్తలు ఇద్దరినీ ఆర్‌అండ్‌బీ అతిథిగృహంలో మధ్యాహ్నం రెండు గంటల పాటు వివిధ అంశాలపై ప్రశ్నించారు. సీబీఐ అదనపు ఎస్పీ రామ్‌సింగ్‌ కడప నుంచి దిల్లీకి వెళ్లాక దస్తగిరికి పులివెందుల నియోజకవర్గంలోని కొందరు వైకాపా నాయకుల నుంచి బెదిరింపులు వచ్చాయి. దీనిపై దస్తగిరి ఎస్పీతో పాటు సీబీఐకి ఫిర్యాదు చేశారు. బెదిరింపుల విషయాన్ని విచారణలోనూ సీబీఐ అధికారుల దృష్టికి దస్తగిరి తీసుకెళ్లినట్లు తెలిసింది.