Crime News: వృద్ధురాలి మెడలో గొలుసు దొంగిలించిన వైకాపా నాయకుడు..

 సీసీ ఫుటేజీ ద్వారా వెలుగులోకి..

బుచ్చిరెడ్డిపాళెం, న్యూస్‌టుడే: శ్రీపొట్టి శ్రీరాములు నెల్లూరు జిల్లా బుచ్చిరెడ్డిపాళెం నగర పంచాయతీ గాంధీనగర్‌లోని ఓ అపార్టుమెంట్‌లో ఒంటరిగా ఉంటున్న మస్తానమ్మ అనే వృద్ధురాలి మెడలో మూడున్నర సవర్ల బంగారు గొలుసు గురువారం చోరీ అయింది. ఈ గొలుసును దొంగిలించిన వ్యక్తిని సీసీ ఫుటేజీల ఆధారంగా పోలీసులు గుర్తించి అరెస్టు చేశారు. బుచ్చిరెడ్డిపాళెం సర్కిల్‌ కార్యాలయంలో నిందితుడిని శుక్రవారం సీఐ సీహెచ్‌ కోటేశ్వరరావు విలేకరుల ఎదుట ప్రవేశపెట్టారు. ఈ సందర్భంగా సీఐ మాట్లాడుతూ నగర పంచాయతీ పరిధి గాంధీనగర్‌లోని ఓ అపార్టుమెంట్‌లో నివాసం ఉంటున్న మస్తానమ్మ మెడలో బంగారు గొలుసును స్థానిక శాంతినగర్‌కు చెందిన బెల్లం అనిల్‌కుమార్‌రెడ్డి దొంగిలించాడని వివరించారు. అతను వైకాపా నాయకుడు. నగర పంచాయతీలో తాత్కాలిక ప్రాతిపదికన శానిటరీ పర్యవేక్షకుడిగా పనిచేసి మానేశాడు. ఆటో యూనియన్‌ అధ్యక్షుడిగానూ పని చేశాడు. ఇతని భార్య వాలంటీరు. ఈమె పింఛన్లు ఇచ్చే సమయంలో తోడుగా వెళ్లేవాడు. ఆ సమయంలో పింఛను కోసం వచ్చిన వృద్ధురాలి మెడలో బంగారు గొలుసు ఉండటం గమనించి గురువారం చోరీకి పాల్పడ్డాడు. ప్లోలీసులు సీసీ ఫుటేజీ ద్వారా నిందితుడిని గుర్తించారు.