ఊయలే ఉరితాడై చిన్నారి మృతి

పెనుగంచిప్రోలు, న్యూస్‌టుడే: ఆడుకుంటున్న ఊయలే చిన్నారి పాలిట ఉరితాడైంది. ఈ ఘటన ఎన్టీఆర్‌ జిల్లా పెనుగంచిప్రోలు మండలం నవాబుపేటలో ఆదివారం చోటుచేసుకుంది. కుమార్తెల దినోత్సవం రోజునే జరిగిన ఈ ప్రమాదంతో ఆ కుటుంబంలో విషాదం నెలకొంది. గ్రామానికి చెందిన గోపి, తిరుపతమ్మ దంపతులకు ఇద్దరు కుమార్తెలు. పెద్దమ్మాయి లలితశ్రీ (7) స్థానిక ప్రభుత్వ పాఠశాలలో ఒకటో తరగతి చదువుతోంది. ఆదివారం సెలవు కావడంతో పిల్లలను ఇంటివద్దే ఉంచి దంపతులిద్దరూ పొలం పనులకు వెళ్లారు. చిన్నారులకు తోడుగా తాతయ్య ఉన్నారు. ఇంటి వసారాలో చీరతో వేసిన ఊయలతో లలితశ్రీ ఆడుకుంటూ ఉండగా ఆ చీర ఆమె మెడకు చుట్టుకుంది. దీంతో చిన్నారి అపస్మారక స్థితికి చేరుకుంది. గమనించిన స్థానికులు వెంటనే లలితశ్రీని నందిగామ ప్రభుత్వ ఆసుపత్రికి తరలించారు. అప్పటికే మృతి చెందినట్లు వైద్యులు నిర్ధారించారు.