యువతిపై ప్రేమోన్మాది దాడి

 పరారీలో నిందితుడు

ఉస్మానియా యూనివర్సిటీ, న్యూస్‌టుడే: ప్రేమను అంగీకరించలేదని యువతిపై ఓ యవకుడు పదునైన ఆయుధంతో దాడి చేశాడు. ఈ ఘటన ఉస్మానియా విశ్వవిద్యాలయ పరిధిలో జరిగింది. ఓయూ ఠాణా ఇన్‌స్పెక్టర్‌ రమేష్‌నాయక్‌ తెలిపిన వివరాల ప్రకారం.. ముషీరాబాద్‌ భోలక్‌పూర్‌ బస్తీకి చెందిన యువతి(18) ఓ ప్రైవేటు మెడికల్‌ దుకాణంలో పనిచేస్తున్నారు. అదే బస్తీకి చెందిన రంజిత్‌(18) అనే యువకుడు ప్రేమ పేరుతో ఆమె వెంటపడుతున్నాడు. ఈ క్రమంలోనే మాట్లాడుకుందామని చెప్పి యువతిని ఓయూలోని మానేరు వసతిగృహం వద్దకు శనివారం రాత్రి ఏడుగంటల సమయంలో తీసుకొచ్చాడు. ఇద్దరి మధ్య మాటామాటా పెరిగి గొడవకు దారి తీసింది. దీంతో తన వెంట తెచ్చుకున్న పదునైన ఆయుధంతో రంజిత్‌ ఆమెపై దాడి చేశాడు. చేతికి తీవ్రంగా గాయమైన ఆమె గట్టిగా అరవడంతో నిందితుడు అక్కడి నుంచి పారిపోయాడు. స్థానికులు, పోలీసులు యువతిని కాచిగూడలోని ఓ ప్రైవేటు ఆసుపత్రికి తరలించారు. యువతి ఆరోగ్యం ప్రస్తుతం నిలకడగా ఉంది. ఆమె సోదరుడి ఫిర్యాదు మేరకు కేసు నమోదు చేసి, నిందితుడి కోసం గాలిస్తున్నట్లు పోలీసులు తెలిపారు.