భర్త కళ్లెదుటే భార్యపై ఆరుగురు వ్యక్తుల అత్యాచారం

పలము: భర్త కళ్లెదుటే ఓ మహిళ ఆరుగురు కామాంధుల చేతిలో సామూహిక అత్యాచారానికి గురైన సంఘటన ఝార్ఖండ్‌లో పలము ప్రాంతంలోని సాత్‌బర్వా పోలీసుస్టేషన్‌ పరిధిలో చోటుచేసుకుంది. భర్తపై ఆగ్రహించిన భార్య లటేహర్‌ప్రాంతంలోని మాణికలో గల తన పుట్టింటికి బయలుదేరింది. దీంతో తన భార్యను వెతుక్కుంటూ ఆ వ్యక్తి బైక్‌పై సాత్‌బర్వా ప్రాంతానికి చేరుకున్నాడు. అక్కడ నడిచి వెళ్తున్న ఆమెను గమనించి ఇంటికి తిరిగిరావాలంటూ ఒప్పించేందుకు బతిమలాడుతున్నాడు. అదే సమయానికి ఆ మహిళ బావ కూడా అక్కడికి చేరుకున్నాడు. వారిద్దరు ఆమెకు నచ్చచెప్పేందుకు ప్రయత్నిస్తున్న సమయంలో ఆరుగురు యువకులు అక్కడికి చేరుకుని ఆ ముగ్గురిని దగ్గరలో స్టోన్‌క్రషర్‌ కర్మాగారంలోకి తీసుకుపోయారు. అక్కడ వారు మహిళ బావను తీవ్రంగా కొట్టారు. దీంతో అతను స్పృహతప్పి పడిపోయాడు. వివాహిత భర్తను కూడా నిందితులు చావబాదారు. అనంతరం ఒకరి తరువాత ఒకరు ఆ మహిళపై అత్యాచారానికి ఒడిగట్టారు. కొద్దిసేపటికి ఎలాగోలా తప్పించుకున్న భర్త పరుగెత్తి పోలీసు గస్తీ బృందాన్ని చేరుకుని జరిగిన దారుణాన్ని వివరించాడు. దీంతో పోలీసులు నిందితుల్లో ఇద్దరిని అరెస్టు చేశారు. బాధితురాలిని ఆసుపత్రిలో చేర్చారు. ఆమె పరిస్థితి ఆందోళనకరంగా ఉంది.