యూపీలో ట్రాక్టర్‌ తిరగబడి ఇద్దరు చిన్నారులు, 8మంది మహిళల మృతి

లఖ్‌నవూ: ట్రాక్టర్‌ తిరగబడి ఇద్దరు చిన్నారులు, ఎనిమిది మంది మహిళలు మృతి చెందిన విషాద ఘటన ఉత్తర్‌ప్రదేశ్‌ లఖ్‌నవూ జిల్లా అసన్హా ప్రాంతంలో సోమవారం జరిగింది. ఈ ప్రమాదంలో మరో 37మంది కూడా క్షతగాత్రులయ్యారు. పోలీసుల కథనం ప్రకారం.. ఓ చిన్నారికి పుట్టువెంట్రుకలు తీయించేందుకు 47 మంది కలిసి ట్రాక్టర్‌లో సమీపంలోని దుర్గాదేవి గుడికి బయలుదేరారు. మార్గమధ్యలో ట్రాక్టర్‌ అదుపు తప్పి, రోడ్డు పక్కనున్న చెరువులో పడిపోయింది. దీంతో మొత్తం 10 మంది మరణించగా మిగిలిన వారిని స్థానికులు రక్షించారు. గాయపడ్డ వారిని దగ్గర్లోని ఆస్పత్రికి తరలించారు. మృతుల కుటుంబాలకు రూ.4 లక్షల చొప్పున పరిహారం ఇస్తామని జిల్లా కలెక్టర్‌ సూర్యపాల్‌ గాంగ్వార్‌ తెలిపారు.