గ్యాంగ్‌స్టర్‌ అబూ సలేంకు మూడేళ్ల జైలుశిక్ష

నకిలీ పాస్‌పోర్టు కేసులో యూపీ కోర్టు తీర్పు

లఖ్‌నవూ: జైలులో ఉన్న గ్యాంగ్‌స్టర్‌ అబూ సలేంకు పాతికేళ్ల కిందటి నకిలీ పాస్‌పోర్టు కేసులో యూపీ కోర్టు మంగళవారం మూడేళ్ల జైలుశిక్ష విధించింది. 1993 నాటి ముంబయి వరుస పేలుళ్ల కేసులో తన పాత్రకుగాను అబూ సలేం నవీ ముంబయిలోని తలోజా జైలులో జీవితఖైదు శిక్షను అనుభవిస్తున్న విషయం తెలిసిందే. తాజా విచారణకు వీడియో కాన్ఫరెన్సు ద్వారా హాజరైన అబూ సలేంతోపాటు అతడి సహాయకుడు మహ్మద్‌ పర్వేజ్‌ ఆలంకు మూడేళ్ల శిక్ష విధిస్తూ స్పెషల్‌ జుడీషియల్‌ మేజిస్ట్రేట్‌ సమ్రిద్ధి మిశ్ర తీర్పు చెప్పారు. ఇప్పటికే అనుభవిస్తున్న జైలుశిక్షలో దీనిని సర్దుబాటు చేస్తారు. జైలుశిక్షకు తోడు అబూ సలేంకు రూ.10 వేలు, పర్వేజ్‌ ఆలంకు రూ.35 వేల జరిమానాను కోర్టు విధించింది. కోర్టుకు హాజరైన ఆలంకు రెండు రూ.20 వేల పూచీకత్తులతో మధ్యంతర బెయిలు మంజూరు చేశారు.