Honeytrap: మాట్లాడదామంటూ గదిలోకి తీసుకెళ్లి.. వీడియో తీయించి..!

శ్రీనగర్‌: సమాజంలో పలుకుబడి ఉన్న వ్యక్తులను ఎంపిక చేసుకొని ‘వలపు’ ఉచ్చులో వారిని బంధించాక రూ.లక్షల వసూళ్లకు పాల్పడుతున్న ఓ ముఠాను జమ్మూకశ్మీర్‌ పోలీసులు అరెస్టు చేశారు. గత ఆర్నెల్లలో ఈ ముఠా రూ.40 లక్షలదాకా వసూళ్లకు పాల్పడినట్లు పోలీసు అధికారులు గురువారం వెల్లడించారు. రూ.8 లక్షలు ఇవ్వకపోతే ‘రహస్య’ వీడియో బయటపెడతామని ఓ ముఠా బెదిరిస్తోందని ప్రభుత్వ సీనియర్‌ అధికారి ఒకరు చేసిన ఫిర్యాదుతో పోలీసులు ఈ కూపీ లాగారు.

భార్యాభర్తలైన శాయిస్తా బషీర్‌, ఐజాజ్‌ అహ్మద్‌ గనీలతోపాటు జహంగీర్‌ అహ్మద్‌ దార్‌ అనే మరో వ్యక్తిని అరెస్టు చేశారు. ఆపదలో ఉన్నట్లు శాయిస్తా చేసిన ఫోనుతో వారి ఇంటికి వెళ్లిన అధికారిని మాట్లాడే మిషతో ఆమె పడకగదిలోకి తీసుకువెళ్లింది. లోనికి చొరబడిన ఐజాజ్‌, జహంగీర్‌.. ఆ ఇద్దరినీ కలిపి వీడియో తీశారు. అడిగిన డబ్బు ఇవ్వకపోతే ఈ వీడియోను వైరల్‌ చేస్తామని బెదిరించారు.