వీఆర్‌ఏ ఆత్మహత్యాయత్నం

నెక్కొండ, న్యూస్‌టుడే: వరంగల్‌ జిల్లా నెక్కొండ మండల కేంద్రంలోని నిరసన శిబిరంలో శనివారం గుండ్రపల్లి గ్రామానికి చెందిన వీఆర్‌ఏ ఖాసిం ఆత్మహత్యాయత్నం చేశారు. ప్రభుత్వం తమకు ఇచ్చిన హామీలను నెరవేర్చాలంటూ.. రెండు నెలలుగా వీఆర్‌ఏలు నిరసన తెలుపుతున్న విషయం తెలిసిందే. నెక్కొండ తహసీల్దార్‌ కార్యాలయం ఎదుట నిర్వహిస్తున్న దీక్షా శిబిరంలో ఖాసిం సైతం పాల్గొంటున్నారు. తమ సమస్యలు ఇక పరిష్కారం కావేమోనన్న మనోవేదనతో శనివారం ఆయన శిబిరంలో బ్లేడుతో గొంతుకోసుకున్నారు. సహచర వీఆర్‌ఏలు ఆయనను స్థానిక ప్రైవేటు ఆసుపత్రికి తరలించి చికిత్స అందించారు. ఖాసిం ఆరోగ్య పరిస్థితి నిలకడగా ఉందని వైద్యులు తెలిపారు.