దివ్యాంగుడిపై సర్పంచి దాడి

అరెస్టు చేసిన పోలీసులు.. ఆపై సస్పెన్షన్‌

న్యూస్‌టుడే, హన్వాడ, మహబూబ్‌నగర్‌ అర్బన్‌: దివ్యాంగుడిపై దాడికి పాల్పడుతున్న ఈ వ్యక్తి ఓ గ్రామ సర్పంచి. తనకు ఉపాధి పనుల వివరాలు కావాలని స.హ.చట్టం కింద దరఖాస్తు చేసినందుకే ఈ చర్యకు పాల్పడ్డాడు. ఈ సర్పంచిని పోలీసులు అరెస్టు చేయగా.. కలెక్టర్‌ సస్పెండ్‌ చేశారు. మహబూబ్‌నగర్‌ జిల్లా హన్వాడ మండలం పుల్పవానిపల్లిలో గురువారం సాయంత్రం దివ్యాంగుడు కృష్ణయ్య ఇంటి ముందు నుంచి సర్పంచి శ్రీనివాసులు వెళ్తుండగా వారి మధ్య వాగ్వాదం జరిగింది. ఈ క్రమంలో సర్పంచి దివ్యాంగుడిని తన్నడమే కాకుండా మండల అధికారులను దూషించారు. అక్కడే ఉన్న కొందరు సంఘటనను వీడియో తీశారు. శుక్రవారం అది వాట్సప్‌ గ్రూపుల్లో చక్కర్లు కొట్టింది. ఘటనను నిరసిస్తూ మండల వికలాంగుల సంఘం అధ్యక్షుడు వీరేశ్‌ ఆధ్వర్యంలో తహసీల్దార్‌ కార్యాలయం ఎదుట నిరసన తెలిపారు. సామాజిక మాధ్యమాల్లో వచ్చిన వీడియోకు స్పందించిన ఎస్పీ వెంకటేశ్వర్లు.. సర్పంచిపై చర్యలు తీసుకోవాలని హన్వాడ పోలీసులకు సూచించారు. ఎస్సై రవినాయక్‌ సర్పంచి శ్రీనివాసులుపై కేసు పెట్టి అరెస్టు చేశారు. ఆ సర్పంచిని కలెక్టర్‌ వెంకట్‌రావు సస్పెండ్‌ చేశారు. దివ్యాంగుడని చూడకుండా విచక్షణ రహితంగా ప్రవర్తించడంతో ఈ చర్య తీసుకున్నట్లు తెలిపారు.