అరకు ఘాట్‌రోడ్డులో ప్రైవేటు బస్సు దగ్ధం

అనంతగిరి సమీపంలో అర్ధరాత్రి ఘటన
పర్యాటకులకు తప్పిన ముప్పు

అనంతగిరి గ్రామీణం, న్యూస్‌టుడే: అరకు లోయ నుంచి వస్తున్న ప్రైవేటు బస్సులో మంటలు చెలరేగి పూర్తిగా కాలిపోయింది. అల్లూరి సీతారామరాజు జిల్లా అరకు ఘాట్‌రోడ్డులో.. అనంతగిరి సమీపంలో మూడో నంబరు మలుపు దాటిన తర్వాత ఆదివారం రాత్రి ఈ ఘటన జరిగింది. విజయనగరం మండలం గొల్లలపేటకు చెందిన 24 మంది పర్యాటకులు ఓ ప్రైవేటు బస్సులో అరకులోయ, బొర్రా గుహలు చూసి తిరుగు ప్రయాణమయ్యారు. టైడా దాటిన తర్వాత వీరి బస్సు వెనకాల చక్రాల మధ్య మంటలు చెలరేగి ఒక టైరు పేలిపోయింది. దీంతో ప్రయాణికులు బస్సును నిలిపివేయాలని డ్రైవరుకు చెప్పారు. అప్పటికే మంటలు తీవ్రం కావడంతో డ్రైవరు ప్రయాణికులందరినీ కిందకు దించేశారు. వెంటనే మంటలు ఎగసిపడి బస్సు పూర్తిగా కాలిపోయింది. విజయనగరం జిల్లా శృంగవరపుకోట నుంచి అగ్నిమాపక సిబ్బంది వచ్చి మంటలను ఆర్పేశారు. ఎవరికీ ప్రమాదం జరగకపోవడంతో అంతా ఊపిరి పీల్చుకున్నారు.