Andhra News: చెక్‌డ్యాంను పేల్చి వేసిన రైతు.. నిర్మిత స్థలం తన పూర్వీకులదంటూ దుశ్చర్య

పెద్దదోర్నాల, న్యూస్‌టుడే: తమ పూర్వీకుల పొలంలో జల వనరులశాఖ చెక్‌డ్యాం నిర్మించిందంటూ పేల్చివేసిన సంఘటన ప్రకాశం జిల్లా పెద్దదోర్నాలలో చోటుచేసుకుంది. గ్రామంలోని నల్లవాగులో 2018లో రూ.9.5 లక్షలతో జల వనరులశాఖ చెక్‌డ్యామ్‌ నిర్మించింది. ఈ ప్రదేశం తమ పూర్వీకులదని, కొన్నేళ్లుగా సాగు చేసుకున్న భూమిలో చెక్‌డ్యామ్‌ కట్టారంటూ మల్లికార్జున.. ఆదివారం రాత్రి బాంబులతో దాన్ని పేల్చి వేశారు.

జల వనరులశాఖ ఫిర్యాదు మేరకు తహసీల్దారు వేణుగోపాల్‌, సీఐ మారుతీకృష్ణ మంగళవారం సంఘటన స్థలానికి వచ్చారు. ఆ ప్రాంతాన్ని సర్వే చేయించారు. 236-3లో 4.77 ఎకరాల చుక్కల భూమిలో చెక్‌డ్యామ్‌ నిర్మించారని తహసీల్దారు తెలిపారు. అది మల్లికార్జున పేరుపై లేదని, ఇతరుల పేరుపై ఉందని పేర్కొన్నారు. సంఘటనకు పాల్పడ్డ మల్లికార్జున పరారీలో ఉన్నారు.