అటవీశాఖ తనిఖీ కేంద్రం నుంచి 17 తుపాకుల లూటీ

మధ్యప్రదేశ్‌లో ఘటన

బుర్హాన్‌పుర్‌: మధ్యప్రదేశ్‌లోని బుర్హాన్‌పుర్‌ జిల్లాలో అటవీ శాఖ ఏర్పాటు చేసిన తనిఖీ కేంద్రంపై గుర్తు తెలియని వ్యక్తులు దాడిచేసి 17 తుపాకులను దోచుకెళ్లారు. నవ్‌రా అటవీ ప్రాంతంలోని బక్డి పోస్ట్‌లో సోమవారం రాత్రి ఈ ఘటన జరిగింది. 15నుంచి 20 మంది వ్యక్తులు ఈ దాడిలో పాల్గొన్నట్లు అధికారులు మంగళవారం వెల్లడించారు. ఇక్కడ అటవీ భూముల ఆక్రమణలు, అనధికారికంగా చెట్ల నరికివేతను అరికట్టేందుకు కొద్ది రోజులుగా అటవీశాఖ బృందాలు ప్రత్యేక కార్యాచరణ చేపట్టాయి. ఈ నేపథ్యంలో ఈ ఘటన జరగడం చర్చనీయాంశమైంది.