సీఐ జగదీశ్‌పై అక్రమాస్తుల కేసు నమోదు

రూ.43.54 లక్షల గుర్తింపు
రెండేళ్ల నుంచి సస్పెన్షన్‌లో అధికారి

నిజామాబాద్‌ నేరవార్తలు, న్యూస్‌టుడే: నిజామాబాద్‌కు చెందిన సీఐ జగదీశ్‌పై అక్రమాస్తుల కేసు నమోదైంది. మంగళవారం ఉదయం నుంచి సీఐ ఇంట్లో సోదాలు జరిపిన అనిశా అధికారులు రూ.43.54 లక్షల అక్రమ ఆస్తులను గుర్తించినట్లు ప్రకటన విడుదల చేశారు. ఇందులో రూ.9.12 లక్షల విలువైన బంగారం ఉన్నట్లు తెలిపారు. ప్రస్తుతం సస్పెన్షన్‌లో ఉన్న సీఐ జగదీశ్‌ గతంలో కామారెడ్డి పట్టణ సీఐగా పనిచేశారు. ఐపీఎల్‌ బెట్టింగ్‌కు సంబంధించిన ఓ కేసులో బెయిల్‌ ఇచ్చేందుకు లంచం డిమాండు చేయగా 2020 నవంబరు 21న అనిశా పట్టుకొంది. కేసు నమోదు చేసి దర్యాప్తు చేపట్టిన అధికారులు.. ఆయన బ్యాంకు లాకర్లు తెరిచి పలు అక్రమ ఆస్తులను గుర్తించారు. అయితే తనపై అనిశా అధికారులు తప్పుడు కేసు పెట్టారంటూ జగదీశ్‌ అప్పట్లో కోర్టును ఆశ్రయించారు. ఇటీవల ఈ కేసును హైకోర్టు కొట్టివేసింది. ఈ క్రమంలో తిరిగి మంగళవారం సీఐ ఇంట్లో అనిశా సోదాలు నిర్వహించింది.

* 2020 నవంబరులో సీఐ జగదీశ్‌ పట్టుబడిన తర్వాత విచారణలో భాగంగా అప్పటి కామారెడ్డి డీఎస్పీ లక్ష్మీనారాయణ, ఎస్సై గోవింద్‌పై సైతం అనిశా వేర్వేరుగా కేసులు పెట్టింది. ప్రస్తుతం వీరు కూడా సస్పెన్షన్‌లో ఉన్నారు.