బీమా డబ్బుల కోసం భార్య హత్య..

బీమా డబ్బుల కోసం భార్యను భర్త చంపించిన దారుణ ఘటన రాజస్థాన్‌లోని జైపుర్‌లో ఆలస్యంగా వెలుగులోకి వచ్చింది. పోలీసులు తెలిపిన వివరాల ప్రకారం.. మహేశ్‌ చాంద్‌ అనే వ్యక్తి తన భార్య షాలుపై రూ.1.90 కోట్లకు 40 ఏళ్ల కాలానికి బీమా చేయించాడు. ఆమెను చంపి ప్రమాదం జరిగినట్లు నమ్మిస్తే బీమా డబ్బును పొందొచ్చని కుట్ర పన్నాడు. అందుకు ఓ కిరాయి హంతకుణ్ని పురమాయించాడు. రూ.10 లక్షలు సుపారీ మాట్లాడుకుని రూ.5.5 లక్షలను చెల్లించాడు. అక్టోబరు 5న షాలును గుడికి వెళ్లమని కోరిన భర్త.. ఆమె మోటార్‌ సైకిల్‌పై వెళ్తుండగా కారుతో ఢీకొట్టించి చంపాడు. ఈ ఘటనలో ఆమె సోదరి తీవ్రంగా గాయపడగా బాధితురాలు అక్కడికక్కడే మృతిచెందింది. బాధితురాలి తల్లిదండ్రుల ఫిర్యాదు మేరకు కేసు నమోదు చేసుకొని దర్యాప్తు చేశామని తెలిపిన పోలీసులు.. ఇది హత్యే అని తేలినట్లు వివరించారు. చాంద్‌, షాలుల మధ్య తరచూ గొడవలు జరుగుతూ ఉండేవని, గతంలో షాలు.. చాంద్‌పై గృహహింస కేసు కూడా పెట్టిందని వారు వెల్లడించారు.