అటవీ అధికారి ద్విచక్ర వాహనం దహనం

పెనుబల్లి, న్యూస్‌టుడే: ఖమ్మం జిల్లా పెనుబల్లి మండలం బ్రహ్మాళకుంట పొలాల్లో అటవీశాఖాధికారి ద్విచక్రవాహనాన్ని శుక్రవారం సాయంత్రం గుర్తు తెలియని వ్యక్తులు తగలబెట్టారు. పెనుబల్లికి సమీప మండలమైన భద్రాద్రి జిల్లా చంద్రగొండ మండలం ఎర్రబోడులో ఇటీవల ఎఫ్‌ఆర్‌వో శ్రీనివాసరావు హత్యకు గురికాగా... అక్కడికి 12 కి.మీ. దూరంలోనే ఈ ఘటన చోటుచేసుకుంది. బ్రహ్మాళకుంట అటవీప్రాంతం సమీపంలో ఉన్న మామిడితోటలో వన్యమృగాల వేటకు ఆగంతుకులు విద్యుత్తు తీగలు అమర్చుతున్నారని లింగగూడెం సెక్షన్‌ అధికారి బానోత్‌ కాళీకి సమాచారం అందింది. ఆయన సిబ్బంది ఇద్దరిని తీసుకొని అక్కడకు ద్విచక్రవాహనంపై బయల్దేరారు. బైక్‌ను పంట పొలాల్లో ఉంచి లోపలకు వెళ్లారు. మామిడి తోట పక్కన జంతువుల వేటకు అమర్చిన తీగలను గుర్తించి తొలగిస్తున్న సమయంలో ద్విచక్ర వాహనానికి ఎవరో వ్యక్తులు నిప్పు పెట్టారు. ఈ ఘటనపై బాధితుడు బానోత్‌ కాళీ వి.ఎం.బంజర పోలీసులకు ఫిర్యాదు చేశారు.