బస్టాప్‌లోకి దూసుకెళ్లిన ట్రక్కు

మధ్యప్రదేశ్‌లో ఆరుగురి దుర్మరణం

రత్లాం: రహదారి పక్కన బస్టాప్‌లో నిలుచున్నవారిపైకి వేగంగా దూసుకొచ్చిన ట్రక్కు ఆరుగురి ప్రాణాలను బలిగొంది. మధ్యప్రదేశ్‌లోని రత్లాం జిల్లా కేంద్రానికి 30 కిలోమీటర్ల దూరంలో ఈ ప్రమాదం సంభవించింది. రత్లాం-లేబాడ్‌ రహదారిలో శత్రుండా గ్రామం కూడలి బస్టాప్‌లో ఆదివారం సాయంత్రం పలువురు నిలుచున్నారు. ఆ సమయంలో ఓ ట్రక్కు వేగంగా బస్టాప్‌లోకి దూసుకొచ్చింది. దీంతో వాహనం కింద పడి ఆరుగురు వ్యక్తులు మరణించారు. 10మంది తీవ్రంగా గాయపడ్డారు. వారిలో 8 మంది పరిస్థితి ఆందోళనకరంగా ఉందని జిల్లా కలెక్టర్‌ నరేంద్రకుమార్‌ సూర్యవంశి తెలిపారు. ప్రమాదం అనంతరం వాహనం డ్రైవర్‌ పరారయ్యాడు.