యువతిపై సామూహిక అత్యాచారం

ఒడిశాలోని ప్రభుత్వ కార్యాలయంలో ఘటన

భువనేశ్వర్‌ అర్బన్‌, న్యూస్‌టుడే: ప్రభుత్వ కార్యాలయంలో ఓ యువతిపై సామూహిక అత్యాచారం చేసిన ఘటన ఆలస్యంగా వెలుగుచూసింది. ఒడిశా రాజధాని భువనేశ్వర్‌లోని ప్రభుత్వ కార్యాలయ భవనంలోని ఆరోగ్యశాఖ ఛాంబర్‌లో ఈ ఘటన జరిగినట్లు బాధితురాలు మంగళవారం పోలీసులకు ఫిర్యాదు చేశారు. ‘సీనియర్‌ గుమస్తా, డ్రైవర్‌ కలిపి అకృత్యానికి ఒడిగట్టారు. ఉద్యోగం ఇప్పిస్తానని ఆదివారం కార్యాలయానికి రమ్మన్నారు. అక్కడికి వెళ్లాక ఆదివారం రాత్రి కార్యాలయంలోనే ఉంచి ఇద్దరూ అత్యాచారం చేశారు’ అని సంబల్‌పూర్‌కు చెందిన బాధితురాలు ఫిర్యాదులో పేర్కొన్నారు. ఈ ఘటనలో నిందితులిద్దరినీ ఉన్నతాధికారులు విధుల నుంచి తొలగించారు.