Hyderabad: ప్రియుడి ఇంట్లో ఉరేసుకుని ప్రియురాలు ఆత్మహత్య

హైదరాబాద్‌: ప్రియుడి ఇంట్లో ప్రియురాలు ఆత్మహత్య చేసుకున్న ఘటన ఆలస్యంగా వెలుగులోకి వచ్చింది. జవహర్‌నగర్‌ పోలీస్‌ స్టేషన్‌ పరిధిలోని యాప్రాల్‌ వద్ద ఈ ఘటన చోటు చేసుకుంది. పోలీసుల కథనం ప్రకారం.. దయాకర్‌, పూజ కొంతకాలంగా ప్రేమించుకుంటున్నారు. ఇద్దరి మధ్య ప్రేమ విషయం పెద్దలకు తెలిసింది. దయాకర్‌, పూజ పెళ్లికి దయాకర్‌ తల్లిదండ్రులు అంగీకరించలేదు. దీంతో తల్లిదండ్రులను ఒప్పించాలన్న ఉద్దేశంతో దయాకర్‌.. పూజను ఇంటికి తీసుకొచ్చాడు. తల్లిదండ్రులతో మాట్లాడి ఒప్పించే ప్రయత్నంలో ఉండగా.. దయాకర్‌ తల్లిదండ్రుల మాటలు విని తీవ్ర మనస్తాపానికి గురైన పూజ... పక్కనే ఉన్న గదిలో చున్నీతో ఫ్యాన్‌కు ఉరేసుకుని ఆత్మహత్యకు పాల్పడింది. సమాచారం తెలుసుకున్న పోలీసుల ఘటనాస్థలికి చేరుకుని కేసు నమోదు చేసి దర్యాప్తు ప్రారంభించారు. ప్రియుడు దయాకర్‌ను అరెస్టు చేసి రిమాండ్‌కు తరలించారు.