ఆ విమానంలో RDXఉందంటూ పోలీసులకు కాల్‌!

ముంబయి విమానాశ్రయంలో కలకలం

ముంబయి: విమానంలో పేలుడు పదార్థాలు ఉన్నాయంటూ ఆకతాయిలు చేసిన ఫోన్‌ కాల్ ముంబయి అంతర్జాతీయ విమానాశ్రయంలో కలకలం రేపింది. దీంతో అప్రమత్తమైన పోలీసులు దుబాయి- ముంబయి విమానంలో సోదాలు చేయగా ఏమీ దొరకలేదని వెల్లడైంది. ఈ ఘటనపై పోలీసులు తెలిపిన వివరాల ప్రకారం.. దుబాయి - ముంబయి విమానంలో ఆర్డీఎక్స్‌ ఉందంటూ ఓ ఫోన్‌ కాల్‌ వచ్చింది. దీంతో అప్రమత్తమైన అధికారులు విమానాశ్రయం వద్ద భద్రతను మరింత కట్టుదిట్టం చేశారు.  విమానంలో సోదాలు చేయగా.. ఏమీ దొరకలేదు. దర్యాప్తులో దీన్ని ఫేక్‌ ఫోన్‌కాల్‌గా గుర్తించాం’’ అని పేర్కొన్నారు. ముంబయి పోలీసులకు ఇలాంటి నకిలీ ఫోన్‌కాల్స్‌ కొత్తేమీకాదు. గతంలో కూడా ఇలాంటి కాల్స్‌ వచ్చాయి. జూన్‌లో మహారాష్ట్ర సచివాలయంలో బాంబు పెట్టినట్టు 53 ఏళ్ల వ్యక్తి ప్రభుత్వానికి ఈ-మెయిల్‌ చేసి అరెస్టయ్యాడు. చివరకు తన కొడుకుకు స్కూల్‌లో అడ్మిషన్‌ దొరకకపోవడంతో తీవ్ర ఆవేదనతోనే ఇలా చేశానని పేర్కొన్నాడు.