Money Garland: వరుడు గుర్రమెక్కుతుండగా.. డబ్బుల దండతో పరార్‌!

దిల్లీ: ఘనంగా పెళ్లి వేడుక జరుగుతోంది. బంధుమిత్రులతో ఆ ప్రాంగణమంతా కోలాహలంగా ఉంది. మెడలో డబ్బుల దండ వేసుకొని వరుడు గుర్రం ఎక్కేందుకు సిద్ధమవుతున్నాడు. ఈలోగా ఓ 14 ఏళ్ల బాలుడు ఆ దండ లాక్కొని అక్కడి నుంచి పారిపోయాడు. ఈ ఘటన దిల్లీలో చోటు చేసుకుంది. వరుడి బంధువుల ఫిర్యాదు మేరకు కేసు నమోదు చేసుకున్న పోలీసులు నిందితుడి కోసం గాలిస్తున్నారు. రూ.500 నోట్లు  దాదాపు 329 ఉపయోగించి ఈ దండను తయారు చేసినట్లు వరుడి తరఫువారు చెబుతున్నారు. అయితే, దండను తెంచే క్రమంలో 79 నోట్లు కింద పడిపోగా వాటిని రికవరీ చేసినట్లు పోలీసులు తెలిపారు. నిందితుడి ఆచూకీ కోసం వివాహం జరుగుతున్న ప్రాంతంలోని సీసీటీవీ ఫుటేజీలను పరిశీలిస్తున్నారు.