CBI: అరెస్టు నుంచి తప్పించుకునేందుకు మొదటి అంతస్తు నుంచి దూకేసి!

గురుగ్రామ్‌: మోసం, అవినీతి కేసులో నిందితుడిగా ఉన్న ఓ బిల్డర్‌ని అరెస్టు చేసేందుకు సీబీఐ అధికారులు వెళ్లగా.. అది గమనించిన నిందితుడు తప్పించుకునేందుకు ప్రయత్నించాడు. ఈ క్రమంలో మొదటి అంతస్తు నుంచి కిందికి దూకేశాడు. ఈ ఘటన హరియాణాలోని గురుగావ్‌ గ్రామ్‌లో చోటు చేసుకుంది. వివరాల్లోకి వెళ్తే.. దిల్లీకి చెందిన సంజీవ్‌ కుమార్‌ అనే బిల్డర్‌ గురుగ్రామ్‌లోని సెక్టార్‌ 72 టాటా ప్రిమంటి సొసైటీలో నివసిస్తున్నాడు. ఓ అవినీతి కేసులో ఇతడు నిందితుడిగా ఉన్నాడు. సంజీవ్‌ ఆచూకీ కనుగొన్న సీబీఐ అధికారులు సొసైటీ గేటు దగ్గర సెక్యూరీ గార్డులతో మాట్లాడుతుండగా... అది గమనించిన సంజీవ్‌ తప్పించుకునేందుకు మొదటి అంతస్తు నుంచి దూకేశాడు. వెంటనే సీబీఐ అధికారులు అతడిని అదుపులోకి తీసుకున్నారు. అతడి కాళ్లు విరిగిపోవడంతో చికిత్స కోసం స్థానిక ఆస్పత్రికి తరలించారు. వైద్యుల సూచన మేరక మెరుగైన వైద్యం కోసం మేదాంత ఆస్పత్రిలో చేర్చారు.