Crime news: లిఫ్ట్‌ ఇస్తానని చెప్పి.. 90 ఏళ్ల వృద్ధురాలిపై అత్యాచారం!

భోపాల్‌: మధ్యప్రదేశ్‌(Madhya Pradesh)లో దారుణం చోటుచేసుకుంది. లిఫ్ట్‌ ఇస్తానని చెప్పి.. 90 ఏళ్ల వృద్ధురాలిపై ఓ వ్యక్తి అత్యాచారానికి పాల్పడ్డాడు. ఇక్కడి షాహ్‌డోల్‌(Shadol) జిల్లాలో ఈ దుశ్చర్య వెలుగుచూసింది. పోలీసుల వివరాల ప్రకారం.. జిల్లా కేంద్రానికి 15 కిలోమీటర్ల దూరంలో ఉన్న ఓ గ్రామంలోని తన బంధువులను పరామర్శించేందుకుగానూ ఓ వృద్ధురాలు ఇటీవల జబల్‌పూర్ నుంచి షాహ్‌డోల్‌ రైల్వేస్టేషన్‌కు వచ్చారు. అప్పటికే రాత్రి కావడంతో రైల్వేస్టేషన్‌లోనే ఉండిపోయారు. మరుసటి రోజు ఉదయం ప్రధాన రహదారిపై ఉన్న అంట్రా గ్రామానికి చేరుకున్నారు.

అక్కడినుంచి తాను వెళ్లాల్సిన ఊరి బస్సు కోసం ఎదురుచూస్తుండగా.. ద్విచక్ర వాహనంపై వచ్చిన ఓ గుర్తుతెలియని వ్యక్తి ఆమెను పలకరించాడు. ఆ ఊరి వరకు లిఫ్ట్ ఇస్తానంటూ నమ్మించి, ఆమెను ఎక్కించుకున్నాడు. అయితే.. ఆమె వెళ్లాల్సిన ఊరికి కాకుండా, వేరే దారిలోకి తీసుకెళ్లాడు. ఆపై.. నిర్మానుష్య ప్రదేశంలో ఆమెపై అత్యాచారానికి పాల్పడ్డాడు. అనంతరం పరారయ్యాడు. చివరకు బంధువుల ఇంటికి చేరుకున్న ఆమె జరిగిందంతా చెప్పారు. దీంతో వారు పోలీసులను ఆశ్రయించారు. గుర్తుతెలియని వ్యక్తిపై అత్యాచారం, ఇతర సెక్షన్ల కింద కేసు నమోదు చేసినట్లు పోలీసులు తెలిపారు. బాధితురాలు ఆసుపత్రిలో చికిత్స పొందుతోందని, నిందితుడి కోసం ముమ్మరంగా గాలిస్తున్నట్లు వెల్లడించారు.